فرغ كّلبي المحبتك ماسكنته
ودكّلي شلون كَلبك ماسكنته
آضن مليون جني ماسك انته
لآن فد نوب مسودن عليـه
فقط كّلبي المحبتك مائل انا
وأبد محبوب غيرك ما آلي انا
ولون يعطش كّليبك ماء أله انا
وألك فدوة العمر انطي نطيــه
حروف اسمك وسط كَلبي نقشنه
وله اوصلنه النتيجه بكل نقشنه
اذا نقشك يناهي من نقشنه
عليّه تصير دنياتي زهيه
فراكك حطم المهجة وسلها
وحبك صار الي غاية وسلها(وسيلة)
هاك عيوني يا حبي وسلها
اذا شافت النوم اعتب علية
الوكت هيهات ما لحظة نصفنة
ونحيرة الشاف حالتنة نصفنة
نصف للغير ثروتنة ونصفنة
ضاع ابين كومة سرسرية
حبيبي انته ذهب صافي ومصفاك
دخلني فلتر همومك ومصفاك
اذا بوسة خذت منك ومص فاك
معفي وما تمر بيه المنيه
العمر يا صاح من هجرك تمرمر
بدليلي سهام احزاني تمر مر
انشدك هم كبل ضايك تمر مر
التمر مر بغيابك مر علية.
العشك نزفنة كلش وادمانة
وصفت ما تعرف اتحب وادمانة
انا الماريد حوا وادم انة
حتة انقذ الناس من الاذية.
عذولي ماوشيته وهَم وشاني
فعل فعلة نذل حاقد وشاني( مبغض )
يخايب يمته تتركني وشاني!
ولك حتى العدو اترحّم عليه
جنت بيركَـ محبّه اوحب ولالي
ونَيم الشّوكَـ بحضاني ولالي
صُفيت ابوحشه لا صاحب ولا لي
حبيب يكَول تنمرله خطيّــه
***
حبيبي وَدّه بشواكَه ولا خص
وبعد عالعام ماشوفه ولا خاص
انااقره بكتب اشواكَكـ ولخّص
واريد افهم ومايطلع بديّـه
حلو اطباعك بحبّك ولّعنّي
وتره عيونك يناهي ولّعنّي
انا المايوم همّي ولّه عنّي
تزيدلي المواجع والأذيّه!
***
يخلّي شبيك بالشّر متّهمني
اوسواليف الأراذل ماتهمني
اذا كَلبك فطير ومات هم ني
يظل بركان كَلبي وموش اليّه
***
مثل ثعبان شوكَكـ ورّماني
وهواكم هوَّ من هدني ورماني
اشعجب ترجع الحضني وره ماني
انتهيت وضيّعت عمري من اديّه!
خضارك عايش أبروحي ونا راي
وكلساع براي اشوفنك ونا راي
من دون الجمر جمرك وناري
يشتعلن يكب بركان بية
عليك الَكلب ينحِب ونت حدّه
ونصِل شوكَكـ بروحي وانت حدّه
نظل نصبر عله المُر وانتحدّه
حياة وموت ماتفرق سويّـــه
عليك عيون تسحر من يراهن
وظنّه يموت بالحب من يراهن؟
يريت عيوني تعمه ومن يرى هِن
لأنك غالي يحبيّب عليّــــه
عجب مامَر شريك الروح بس لاح !
رماني وردت اصد السهم بس ..لاح
لجيبك لو تصير اليوم بسلاح
وتداوي جروح علاّتي الخفيه
اموت بنطرة اعيونك وشعرك
واحب اسمع مواويلك وشعرك
تمنيتك قصيدة انت وشعرك
و ردد بيك كل صبح و مسية
ارياج معكده تصبح وامره
من امرن خالي منزلهم وامره
اسلي الروح مره اظحك ومره
زفير اليحرك الثوب العليه
بعت كلبي وملكتك مالك أحلة
لأن أجمل مشاعر مالك أحلة
صدك رمش عيني ماله كحلة
بس أطراف أصبعك كحلة لية
أذب جلدي بغيابك وأنتزعلك
وأهد وافزع وأجيلك وأنتزعلك
زعل الناس زعلة وأنتة زعلك
تزعل الكون من تزعل علية
وحك آية عصا موسى وسينا
الك حثت رجايبنه وسينا
الك حسن النبي يوسف وسينا
الي والنور الك والنار اليه
عليك المات والحي سائل آنه
صلب لاكن لربعي سائل آنه
وگفت اباب بيتك سائل آنه
اذا ما تنطي ليش تكص اديه
مع تحيات العســـــــــــــــاس